منتديات رونق الحب  

بسمة الروح

الإهداءات


العودة   منتديات رونق الحب > الاقسام الادبية > شعر شعبي عراقي دارميات ابوذيات



دارميات حب, دارميات عراقية, دارميات غزل

إضافة رد
 
LinkBack أدوات الموضوع انواع عرض الموضوع
قديم
05-24-2012, 03:39 AM
  المشاركة رقم: 1
المعلومات
الكاتب:
اللقب:
7aidar

البيانات
التسجيل: Dec 2011
العضوية: 1
المشاركات: 39,587
بمعدل : 46.23 يوميا

التوقيت

الإتصالات
الحالة:
H.V غير متواجد حالياً
وسائل الإتصال:

المنتدى : شعر شعبي عراقي دارميات ابوذيات
افتراضي دارميات عراقية 2012 حب غزل شجن اشواق فراق




همــٌكْ .. وهَم الناس .. وهَم همْ الأيــــــــــــام
وفوكًـــــاها هم العين ماتقبل إتنــــــــــام
============================
همٌك وهم الناس وهم الله فـــــــــــــوكًًـه
صاحت عليــٌه الناس جن عندي بوكًـــــــــــه
============================
متعجـٌب المهمــوم يشرب جكًــــــــــــــاره
كًلبي بكثر ما ينــــوح تجويـــــــــــني ناره
============================
همٌــــك .. وهم الناس وهم هم الهمــــــــــوم
لو وحده منهن بيــــك ماتكًدر إتكًــــــــــوم
============================
نذرك ياسيد دخيـــل نوط أبو الميـــــــــــــــه
من أفز والكًًه إهــــــــــواي غافي إعله إديـــــُه
============================
الدهر بس وياي راكب إحصانــــــــــــــــه
ويكًــــلي وين إتروح جدٌامـــك آنــــــــــه
============================
الدهر بس وياي جزٌاهـــا الحـــــــــــدود
بالدين أوفي الدين واتديــــــــٌــــن إردوود
============================
كًلبي أرد أكًــصٌــه إبموس وأكوي إبمكانــــــــه
علٌمني إعله درووب كلهن مهـــــــــــــــــــانه
===========================
كًــلبي أرد أكًـصٌه إبموس وبفاس أكًطعه
خلُصها بالسختــات مالحكً ربعــــــــه
===========================
شامت وكًف عل الباب حاير شــــــــكًـلٌـه
أرتجي إعله المكســــور لو دمعي إهلـٌــــــــه
===========================
إرتجي إعله المكســــور حيل إردس الكًاع
بالك تذل جدام شمٌاتك إبســــــــــاع
===========================
شمٌـاتي مو شٌـمات شمٌـاتي شمٌــــــــــــات
بالكًبر ويسألــون حي بعده لو مـــــــــــــات
===========================
شِمـٌاتي مو شِمــٌات شماتي شرطـــــــــــــه
بالكًبر ويكًولـــــون طلعه أرد أكًرطـــــــــه
===========================
وينه اليصل لهواي يشكيله حـــــــــــــالي
أوجرن حيل وياي ذنـٌي الليــــــــــــــالي
===========================
هم شفت بيت أنذال ربـٌـاله حُـره
جا كًــلنه بالتبليط تطلع إفطـٌــــرٌه
===========================
الميت إشمدريــــه باليمشي جنـٌــــــــاز
لكن طبعها الروح تربي إعله الإعــــــــــزاز
===========================
خلـٌـيتك إبسرداب فوكًًـــــه متر صَـبْ
صبٌـح الواشي وياك من ياكتر طـَــــــبْ
==========================
من قِِسـت حلك إهواي المحبس أصغـــــــــر
خافن يغص بالماي يالكاظم إستـــــــــــــر
==========================
سَـلٌـمْ ولَو بالعين تكفي الإشارة
روحي إبتلت بهواك سـَـوٌيلي جــــــــاره
==========================
وينه اليخَيـطْ العين ويفكني منهـــــــــــا
كل ما تصد للدار يكثر حزنــــــــــــها
==========================
شفت الضوه إمن إبعـيد كًلت إحتركًننـــــه
لمٌـن وصلت البيت لن ولفي عدنـــــــــه



==========================
مانمت نص اليل خلف المخده
والدمع صاير سيل للركبه حده
==========================
كل السنون إعظام بس سنه فضه
زبد ويذوب اهواي ومنين اكضه
==========================
حطي ايدج اعله اثنين بنتي الطمع زين
والثالث احجي وياه بالج تغلســـــين
==========================
هم شفت هم سمعيت هاي العجيبه
بعيني شفت يا ناس بريه شيبــــــه
==========================
جا وشحلات الجا ... جا لعد انتـــــــه
جا الحجي بلا جا ... جا شنهي لذتــــه
==========================
الطول طول اهواي والمكفة مكفاه
بالبصرة عفت اهواي أشوصله هنا
==========================
هاك أبرَه . , هاك الخيط خويـه أرد أكلفـَـــــــــك
أمسرٌد الدلال شِــلـٌــــه إعلى عِرفَـــــــــــك
==========================
الدنيا للتِـــهواه تفتحلـَـه الأبواب
ينزاح حتـٌى الكَيـظ ويصيــر خنياب
==========================
حسـرَه إلكْ بالدَلال ظـلـٌتْ لما أمـــــــــوتْ
ماتدري حقها الناس إصوابي بسكـــــــــــوتْ
==========================
عفيه كَلب مَي ليــن من يسمع إبجــاي
لو من صخر هم جــان لان وغده مــاي
==========================
علمني عالنسيان ارد انسى ضيمـــــك
ويه غيري قمره اتصير بس حصتي ضيمك
==========================
هم آنا مثل الناس هم عندي بطه
راحت تغط بالشط والغطه غطه
==========================
أهلا وسهلا بيــك وكثــَر بالوياك
الكَلب قبل العين فز وتلـَكَـــاك
==========================
يقول الشاعر العربي
لابد من حي الحبيب زيارة ولو شبكت حول الخيام رماح

ويقول الدارمي
أُوصـَـل إل حي إهواي لو تشبـج إرمـــــاح
والمعتـني الطيبــات مو فشـله لو طـــــــاح
==========================
زيبكَ إبكف سكران خـَلٌتني دنياي
مابيه أجيك إزحــوف ولابيه مشـٌاي
الدنيا بس وياي شـَدت عداوه
ولا واحد إمن الناس لجروحي داوه
الدنيا للتِـــهواه تفتحلـَـه الأبواب


ينزاح حتـٌى الكَيـظ ويصيــر خنياب
الدنيا للتهِـواه تِركَص إمفرعــه
وآنه تجيني إبموس وتكَلي إبلعــه
الدنيا للتهواه تركَصله جــوبي
وآنه الفكَر يا ناس شكَــٌالي ثوبي
يالكَلت سبع سنين عمر الكَلب شـــاط
آنه لفاني الظيم من لف الكَمــــــاط
==========================
الواشــي فنـٌـه إيفـوت الواشـي فنـــٌــــــــه
دم للرجــــــاب إيصيــر وآخذها منــــــــــــه
==========================
دم للرجـــاب إيصيــر متعَـجٌب إبهـــــــــــاي
بالدم مِشـــه المشحــوف متعــٌني لهـــــــــواي
==========================
بالدم مشــه المشحوف منها وتكفيــٌـــــــــت
آنه أكسر التابوت وآكل لحم ميــــــــــــــت
==========================
أطلـَـك وأعت بالكًـــــاع مثل المعســــــره
حسبالي عشـر إفروخ تاليــها حســــــــــره
==========================
حسـرَه إلكْ بالدَلال ظـلـٌتْ لما أمـــــــــوتْ
ماتدري حقها الناس إصوابي بسكـــــــــــوتْ
==========================
==========================
شلونـــــــك.. شلون الدار .. وشلون الأحبــــــاب
أذكر جرح بجلاك خبـٌــرني ما طـــــــــــــــــاب
==========================
شلونــــــك .. شلون الدار .. شلون الدجاجــات
هم منهن إتذبحـــون للعدكم إيبـــــــــــــات
==========================
زين آنه . . زينه الدار . . زينه الدجاجـــات
نذبح أركًــــاب أزلام للعدنـــه إيبـــــــــات
==========================
شلونـــك .. شلون الدار .. وشلون الفروخ
لبسو إهدوم العيــد !! لو لِســـــه صلوخ
==========================
ناكًًــــه إشكثر للغير درٌن ثدايـــــــــاي
تاليهـــا للكًًصــاب ودٌ تــني دنيـــــــاي
==========================
ماهًمني الكًًصـــــاب من علٌــك إجــــــــلاي
همني الصديق الكًًـــــال عيٌــرلي من هـــــــــاي
==========================
صيـٌحت حيــل وحيــــل باليمنه وأوميــــت
ياهو الكًًــــلتله إدخيـــل ظم روحه بالبيـــــــت
==========================
إنته يظل بالبيت الردتـــه فــــــــــــــزاع
آنه الكًًــلتله إدخيـــــل ظم روحـــه بالكًًـــــاع
==========================
متعني للعبــاس أشكي الهظايـــــــــــــــم
الواشي قبلي بيـــــوم بالحظره نايــــــــــــم
==========================

==========================
متعني للعبـــاس أبجي إبحظرتـــــــــــــــه
والينكســر بهواه شنهو جبرتــــــــــــــــــه
==========================
مانمت طــول اللـــيل حلف المخـــــــــــدٌه
الدمع صــاير سيــل للركبه حـــــــــــــدٌه
==========================
رحت آنــه للدكتـور حاجاني بسكـــــــــوت
لو ولفـًـــك إيداويــــك لو باجر إتمـــــــوت
==========================
روحي إبسريـــر الموت تنشدني عنـٌــــــك
وتكًًـــلي ليش إهـــواك متبري منــــــٌـك
==========================
حقي من أحامي إعليـــج ياشجرة التيــن
ماي الربيـــــتي إعليه من دمعة العيــن
==========================
آنه من أحب إشفاك كل ساكني إيهـــــــــيج
يبقه الطعم ويٌــاي وي بلعة الريـــــــــج
==========================
رحت آنــه للدكتـور حاجاني بسكـــــــــوت
لو ولفـًـــك إيداويــــك لو باجر إتمـــــــوت
==========================
روحي إبسريـــر الموت تنشدني عنـٌــــــك
وتكًًـــلي ليش إهـــواك متبري منــــــٌـك
==========================
حقي من أحامي إعليـــج ياشجرة التيــن
ماي الربيـــــتي إعليه من دمعة العيــن
==========================

==========================
آنه من أحب إشفاك كل ساكني إيهـــــــــيج
يبقه الطعم ويٌــاي وي بلعة الريـــــــــج
==========================
ظَل إبجي بالكارووك أبداً مهِــــــــــــــــزَك
لو إنك إبن إهواي جــان إشمعـــــــــــزٌك
==========================
حبله وأهز كارووك وتسعـــــه اليلعبون
كلهم فِده لهواي لو مر يروحــــــــــون
==========================
حبله وأهز كارووك وتسعه المِـسلحيــــــــــن
مال العمى يا عيـن عالدرب تربيـــــــــــــن
==========================
من جبتو طاري إهــواي تيـٌهتْ شــــوري
خـدٌرت بالفانوس حسبالي قـــــــــوري
==========================
سود العيـون إكبـار والحـَـلِـك محبــــــس
ويسترها رب الكون من دلع تلبــــــــــــس
==========================
أنســه ألله كون أنســــاك وأبرى من الإسلام
عل الكًــــبر لو مريـٌـت أتهزهز إعظـــــام
==========================
برد الصبح كًـرصـات لِـفـْـني إبعباتـــــــــكْ
وبســاعة الشيطان إنته وي ذاتــــــــــــــــــك
==========================
من الحزام وفـــوك مرخوص الأســـــــــــــمر
خاف الطمع يوزيــــــــك واحنه إنتكشمـَــــــــر
==========================
كون أنكًـــلب فنجان بيد الكًــــــــــهوجي
وأوصل إل حلك إهواي وانتحب وأبجـــــــــــي
==========================
كون الحبيب إيصــير مقلد والبســـــــــــه
وبين النهد والثوب سنتين أحبســـــــــــــــه
==========================
كون التريـــــــده الروح أ ُجـٌرب لنـٌــــه يمـٌك
وتكًضي العمر ويــاه إتشمه ويشمٌـــــــــــــــك
==========================
روحي إبسريــــر الموت تنشدني عنــٌـك


وتكًلي ليش إهـــواك متبري منـٌـــــــك
==========================
أرد أسـأل العشــــــاك ليش آنه مشتــــــــــاك
نايم إبحضن إهــــواي واشكي من الفــــــــــــراك
==========================
ميت والمعزيــات موش أمهــٌاته
مايبجـَن إعله المات يبجـَن شمــاته
==========================
ميت والمعزيات يبجـَن عياره
ويرمـَن على التابوت كَطف الجكًــاره
==========================
ميت والمعزيات مابيهن أمـــــٌه
وحده التشـَتم بيه وحده التـُغمـٌه
==========================
كل ما يجي الليل أذكر وفــــاكم
واذكر محاشي الطيب وابجي أبرهاكم
==========================
ويا النجم سهران وايدي أعلى خــدي
الليل أوظلام الليل شو كلها ضـــدي
==========================
انت العطش والماي وانت المشوفـه
ورسمش وحق عيناك بالكاس اشوفه
==========================
أرد انشدك وارجوك صارحني ياهواي
تذكرني لوغصيت من تشرب المــاي
==========================
نارك يخايب ماي مومثل نـــاري
اومن يطري بيا الشوق يحترق جاري
==========================
هم حلو .. وهم إزغيــر .. هم أزرك عيون
بس بيه طبع مو زين من يوعد إيخــــون
==========================
بالك تقول الاه ياخويا بـــالك
كل التقوله ايصير روحي ابدالك
==========================
مبخوت أضل للشيب يافلان أذكـرك
أوينكرني نور العين من كون أنكرك
==========================
بيدي أوقرضها الفار فجت عباتي
كل هذا ماطخيت وامشي ابرهاتي
==========================
أتمنى كون أيصير لحدي أويا لحدك
أو من يطلع الدفان أقعد وقعـــدك
==========================
شقيت ثوبي أعليك وصلته للنــص
جاوين قلبك أوياي صاير مثل جص
==========================
اشمالك يبعد الروح لونك تغــير
عندي خوات أهواي طب أوتخير
==========================
يسألني البطران حالك إشلونــه
الغاضب الله إعليه هم ينشدوونـه
==========================
جاشلي بالخوان والماينفعـــــون
عود أمن اموت أيجون ويا اليشيعون
==========================
عبالي طيب زاد واعطيتك اعيون
تالي توج النار ويا اليكرهـــون
==========================
علمني عالنسيان ارد انسى ضيمـــــك
وي غيري قمره اتصير بس حصتي ضيمك
==========================
سبحان امن خلاك تقسي ابغرامك
جانك اتداوي اجروح رقت كلامك
==========================
اوقف يبعد الروح اوياك الحســـاب
سَافر أو جرحي اينوح ليهسى ماطاب
==========================
هامسى أوها مصباح باجر يشيلـون
اورجليا شالت طيب من دمع العيون
==========================
ارد انشد الصباغ هم يصبغ اقــلوب
اصبغ دليلي اعليك واحزن فرد نوب
==========================
حـط باللبن تيــزاب مجبـور أشربـه
بس لا أشوفك يوم تمشي وي غربـــه
==========================

==========================
سباحه لك بالروح خضرى أوطريه
تسقيها من تشتاق وتمر علــــيه
==========================
ياماخذين الولف اوليفي وريد أويـاه
مانام لليل الشتى أومقدر على فرقاه
==========================
الدنيا ماتسواش لاتصفن إلهـا
عالطيب والمزيون يكثر حملها
==========================
يسألني البطران ليش راسك اقرع
مايدري على الحلوين شعري تشلع
==========================
يسألني البطران تشرب عرق ليش
هم سقم هم فراق هم لوعة الجيش
==========================
الدنيا بس أوياي صارت حريصـه
أو من سلة المكتوم تطلع لي شيصه
==========================
همي الليالي اتعود واتعاتب أوياك
احجايه للشمات خلاني فرقــاك
==========================
أرد اسأل العراف واهل القوافـي
ليش الحجاب إيلوق للوجه صافي
==========================
حطيتك بسرداب وفوقه متر صـب
اصبح الواشي وياك من ياكتر طب
==========================

==========================
وينه اليخَيـطْ العين ويفكني منهـــا
كل ما تصد للدار يكثر حزنــــها
==========================
لو غبت عني الروح احسبها شده
واحرق ابدمع العين حتى المخده
==========================
بالك تمر بالدار عنها أشمر ابعــيد
دار العزيز اهواي نوح أوبجي اتريد
==========================
عمده ارد امر بالدار والنوح ازيده
واسمع صداها يقول راح التريده
==========================
عمده ارد امر بالدار واشبع مغمه
والمعتني الطيبات لوطاح شيهمه
==========================
غصبن عليها الروح جابتني اشوفك
كفر عليها للوم بلجن تعوفــــك
==========================
أهلا وسهلا بيــك وكثــر بالوياك
الكَلب قبل العين فز وتلـكَـــــاك
==========================
اقدر اسكت الناس وامك واخوتك
قلي شيسكت اهواك لودره ابموتك
==========================
ياعازة الخوان عازتها عــازه
والماوراها صياح وحشه الجنازه
==========================

==========================
انشدني عالحال حالي أعلى حـــــاله
سمجه أوشحيح الماي وبظهري فاله
==========================
حسـره إلك بالدلال ظـلـت لما أمـــــــــــــوت
ماتدري حقها الناس إصوابي بسكـــــــــــوت
==========================
القلب قال أحاه ! قتله وجعــــــــــتين
منهو الاجى أوعزاك من طقك البين
==========================
يالردت عني اتروح خليلي صبرين
واحد يصبر الروح والثاني للعـــين
==========================
شامت وكًًف عل الباب حاير شـــــكًًـلـه
أرتجي إعله المكســــور لو دمعي إهله
==========================
إرتجي إعله المكسـور حيل إردس الكًًاع
بالك تذل جدام شماتك إبســــــــــــــــــاع
==========================
اقعد ابتالي الليل وادعي ابصلاتي
ياربي بعد افلان شلي ابحيــــــاتي
==========================
ارد انصحك يافلان هذي النصيحه
عوف اتلف وادور حب الصريحه
==========================
ريته اليطيح ابضيج كون اخوه وياه
اول مايقول احاه كلها اتلــــــــــقاه
==========================

==========================
إلي تطلبه ايصير بس أمر انــته
أو لاتعب الجلمات أشرلي سكته

الرد
أطلب وقلك صار تامرني أنــــته
عمري من أول يوم بسمك رهنته
==========================
ميت والمعزيات يبجن عيـــــاره
طفن على التابوت راس الجكاره
==========================
الدهر شل يمناي شل يسرتي الــــــبين
جابيش اصبر الروح بيش امسح العين
==========================
من كثر حر الضلع أحترقن هدومي
وتسعين ناقة وجمل ماشالن همومي
==========================
هاك ابره هاك الخيط كوم امشي عني
لو بيه اشل جروح جاشل هـــــــــذني
==========================
حسره وحدرها احاه وبقلبي لــوعه
كلما اضوق الزاد اركض وازوعه
==========================
جاوبني تدري الوقت بوقاته سكتــاوي
موش أنته نبعة عشق بالحسن متغـاوي
==========================
غصبن عليـه الروح آنـه الأذلهـا
محتاج والحاجات ماهـمـه أهلهـا
==========================
==========================
أنوح أولاهلي يدرون بيه
تموت الروح والعله خفيه
==========================
بسك ولك يالبين دقاتك أويـــاي
أدقني وسط الضيق وتشمت اعداي
==========================
الاخو وقت الضيج ماينكر أخـته
أوحان الوقت هاليوم ياخويا وقته
==========================
أقبل صباح اليوم ابدنيتي هـــاي
شلت الردا أوفزيت لن عيني بهواي
==========================
لانفع نصحي أوياك لانفع لــــومي
أنا ادري مامحضوض راح ابقى دومي
==========================
لاواشي لانمام يبعدني عــنك
بس النجف يهواي ياخذني منك
==========================
تيزاب أحط بالعين واعميها بجـــفاك
خافن تصد للغير أوتنسى المضى أوياك
==========================
متعجب بدنياك جرحتك مــره
منخل اقليبي صار بيه العمه يقره
==========================
ميت والمعزيــات موش أمهـاته
مايبجـَن إعله المات يبجـن شماته
==========================

==========================
ميت والمعزيات مابيهن أمــــه
وحده التشـتم بيه وحـده التـغمه
==========================
همــك .. وهم الناس وهم هم الهموم
لو وحده منهن بيــك ماتكًًدر إتكـوم
==========================
طقني أو طحت للقاع قلت اكتفى البين
طقاني مره النور أوخر ضوى العـين

الرد
كل دقش أعلى الراس بسش يدنياي
مطقوقه باليافوخ ماشوفن احــداي
==========================
اصغير وخاف إعليك من شـــدة الاه
اشنون احمل أنا افراق واصبر بلا اياه

الرد
اصغير وخاف اعليك من حضن امك
ابقلبي وقول ابعيد جاوين اضمــك
==========================
بيدي أوقرضها الفار فجت عباتي
كل هذا ماطخيت وامشي ابرهاتي
==========================
أتمنى كون أيصير لحدي أويا لحدك
أو من يطلع الدفان أقعد وقعـــدك
==========================
بيدك ضيعت ديك الليـــالي
وبلحظه ما أجى أبعينك دلالي
==========================
سباحه لك بالروح خضرى أوطريه
تسقيها من تشتاق وتمر علــــيه
==========================
سبحان امن خلاك تقسي ابغرامك
جانك اتداوي اجروح رقت كلامك
==========================
اوقف يبعد الروح اوياك الحســـاب
سَافر أو جرحي اينوح ليهسى ماطاب
==========================
ياماخذين الولف اوليفي وريد أويـاه
مانام لليل الشتى أومقدر على فرقاه
==========================
يسألني البطران ليش وجهك اصفر
مايدري على المحبوب قلبي تفطر
==========================
يسألني البطران ليش راسك اقرع
مايدري على الحلوين شعري تشلع
==========================
يسألني البطران تشرب عرق ليش
هم سقم هم فراق هم لوعة الجيش
==========================
يسألني البطران اعربلي كان
حسباله مثل العام عقلي بمكانة
==========================
انشدني عالحال حالي أعلى حـــــاله
سمجه أوشحيح الماي وبظهري فاله
==========================

==========================
حسـره إلك بالدلال ظـلـت لما أمـــــــــــــوت
ماتدري حقها الناس إصوابي بسكـــــــــــوت
==========================
الدهر شل يمناي شل يسرتي الــــــبين
جابيش اصبر الروح بيش امسح العين
==========================
حسره وحدرها احاه وبقلبي لــوعه
كلما اضوق الزاد اركض وازوعه
==========================
أشرب واريـد أنساك واسكر واذكـرك
مو بالعظم ويطيــب بالكًلب كســرك
==========================
كل مرض لامابيك ياخويا محسود
اوحق اليحسدك داخ بعيونك السود
==========================
منك سمعت الاه كثرت جراحـي
وشبيدي خويا اعليك قصوا جناحي
==========================
وين الكفن ينباع يالشايل الخـــــام
عدله أرد أطمها الروح من ظيم الأيـام
==========================
لم جرحك أو للبيت قوم امشي ويـاي
وامشي ابدلال أرجوك لاتشمت اعداي
==========================
اجلد ابممشاي ناحل ترانــــي
خوفي من الشمات مو من زماني
==========================

==========================
أتجدب علي واتقول , اسمع كلامك
وانا ابطيب القلب امشي ابمرامــك
==========================
عفيه كَلب مَيليــن من يسمـع إبجـاي
لو من صخر هم جـان لان وغده مـاي
==========================
مر والمراره البيك محد حواهـــا
أو روحي اشتهت ملقاك عفيه اشقواها

الرد
روحي اشتهت ملقاك رغم المراره
أو بجفوفك الدلال شيطفي نــاره
==========================
متعني للعبـاس أشكي الهظايـــم
الواشي قبلي بيـوم بالحظره نايـم
==========================
متعني للعباس أبجي إبحظرتـه
والينكسـر بهواه شنهو جبرتـه
==========================
قلنا دلال إيجوز وتحمليـــــنا
أو ماندري بيه مغرور يلعب علينا

الرد
ألعب عليك إشلون وانت أعز مني
أو صدقني مو مغرور يالتتهمـني
==========================
بطلت ممشى الحيل قمت أمشي تاته
أومثل اليقودن بيه أمه أو خـواتـه
==========================
لو ممشى عشر اسنين أمشيها واكثر
ماأتعب وما جوز من حب الأسمـر
==========================
حسبالي خوش وليد وسلمتك الروح
طلعت عقرب تلدغني وتريد اتروح
==========================
أبيات من الدارمي العراقي
دارمي معاصر لعواد العابدي
===============================
خاف أحجي ويكَولون سب الحكومه
كفاره يطّي النوب يرهن إهدومه
===============================
سولف يبعد إجلاي ويحلها حلال
إضبط إعصابك زين كون أنت رجال
===============================
ذب شصّك وبعدين تصفي القضيه
لو سجن سبع إسنين لو تطّي ديّه
===============================
مو شص وحكَ عيناك سلّيه ذبيت
خلي اليصير يصير خلي أهجم البيت
===============================
مرت علينه إسنين بس نسمع أخبار
بلكي إنقلاب إيصير والطاغي ينهار
===============================
ما قصّر الله إبهاي ودّه البطل بوش
داس إبطن صدام وتفلش الحوش
===============================
خابرت أمي إبساع يا يمه وينج
باجر نرد للبيت خل تكّر عينج
===============================
هلهلت يم الباب وإلتمت الناس
مبروك ألف عالخير راح إبن المداس
===============================
من غبشه كَبل الناس راحت على السوكَ
جابت حضن صمون عود إنّه ريّوكَ
===============================
شعلت بخور النوب وتبخر الدار
عام ونص إمتانين والقوري بالنار
===============================
أيست والأيام طالن عليها
وردت مثل ما جان تصفج بأديها
===============================
فرحتنه بالتغيير طلعت حلم نوم
مثل السراب وراح ما يبكَه للدوم
===============================
كَلنه الفرج والخير والحظ إجانه
مثل الي راد إكَرون كَصوا له إذانه
===============================
نفس الصفر والطاس ما بيّن الزين
بس رحمه مو ممنوع نبجي إعلى الحسين
===============================
كَالوا بعد سنتين ونوزع إبيوت
تاليها حتى المات ما عنده تابوت
===============================
كيّفنه كَلنه نصير مثل الإمارات
ماي وضوه وتبليط مو بس قرارات
===============================
حجّتهم إستقرار مامش بالبلاد
تانونه عشر إسنين ونضوي بغداد
===============================
ننتظر عشر إسنين نحمي إعلى جوله
نتعارك إعلى إبريج ما عدنه لوله
===============================
جا ولكم شتردون غير المسيرات
يتنفس الجوعان حي بعده ما مات
===============================
رحمه العلم سواه مجلسنه لونين
إقماشه من باريس وفلوسه بالدين
===============================
إمبارك وعالخير هاي العداله
صبح ومسه إيغنون عالبرتقاله
===============================
إلنوبه خاف التين من يسمع إيغار
وبساحة الفردوس يحتج على الصار
===============================
خل يحتج الرمان خل يحتج التين
مليوصه هيه وشاخ بالديره الكَطين
===============================
نومتنه هاي إهنا للجمري يهواي
لمن يرد إردود ويغرب الماي






عرض البوم صور H.V   رد مع اقتباس

Powered by vBulletin Version 3.8.7
Copyright ©2000 - 2012, Jelsoft Enterprises Ltd
Search Engine Optimization by vBSEO ©2011, Crawlability, Inc.
رونق الحب|rss2|sitemap|ابراج اليوم|اغاني عراقية|كاشف الانفزبل|tags
أنظم لمعجبينا في الفيس بوك ...